en an schbedn heabst (fia d eani)

fua da dia regnd s
un en mia regnd s
jo da heabst is en mia
grod wia draust
jetzt singd scho da rob
iwan suma sein grob
und da himö is driab
das s am graust..
und da wind dea riad um
ea r alaa is ned schdum
ea schraufd se
duach moak und duach boa -
owa d fegl san schdad
d blia und d blaln fawad
und mii drugt mei heazz
wia r a schdaa...

liad

a glans mal
en an madrosnqandl
en da sun
unta r an nussbam
und zwa robm
de was ia
en heabst bringan

a weisse woikn
duach n blaun himö

fliang fliang
fliang mechad e hoed kena
one maschinarii
wia r a fogal
auf fligln..

a glana bua
en an madrosnqandl
en reng
unta r an bopöbam
und zwa daum
de wos eam
es früjoa bringan

a blaua himö
duach d weissn woikn

fliang fliang
fliang mechad e hoed kena
one maschinarii
wia r a fogal
auf fligln...
T: H. C. Artmann, aus: med ana schwoazzn dintn, Salzburg 1958.